İke töpçek

Çit il täcribäse

Şähär başıbız, Ísxaqovnıñ berwaqıt donyanıñ şähärbaşları oyışmasınıñ başı bulıp saylanğanı mäğlüm. Nigä bu ğorur wazfanı mäsälän Helsinki başına, yä Pariş başına, iñ azınnan Amsterdam şähäre başına birmägännär ikän? Bu mäs'äläne ike töpçek yassılığında sıníq äle.

Helsinkida mäxällälärneñ kübendä cäyäwle suqmaqları ikegä bülengän - cäyäwlelär üzläre häm velosipedçılar öçen. Küp kenä fin - bay da urtaçası da eşkä iketöpçektä bara. Keçkenä bala bulğan analar da yaratqan şöğellären taşlarğa telämilär - velosipedqa bala bişegen tağıp, äkrenläp yörilär. Yış qına artında velosiped öçen totqıçları bulğan maşnalar uzıp kitä.

 

 

Frans başqalası xartasında metro häm manzaralardan başqa velosipedçılar suqmaqların tabarğa bula. Ğädättä velosipedçılar, autobus häm taksi öçen uramnıñ ayırım öleşe ayırılğan. Pariş - zur ber şähär, borınğı öleşenä genä ber Qazan sía ala. Ber köndä Notré dam, La Tour Eiffel, Quartal Latin, Louvre'larnı kürer öçen iñ caylı häm iñ arzan xäräkät ısulı - velosiped (metro bäyäse - 1-1.5 €).

 

Amsterdamğa poyez belän kilgän qunaqlarnıñ berençe kürgän närsäläre - timeryul vokzalı yanındağı öç qatlı velotoraq. Ällä dürt meñ, ällä qırıq meñ urınlı - bolay da añlaşıla, Amsterdamda töp xäräkät ısulı - velosiped. Toraqtağı velosipedlarğa qarasañ, hollanlarnıñ yarlı buluı uyğa kilä ala - 10-20 yäşle qat-qat buyalğan velosipedlar. Dörese şunda: alarda da qaraqlıq taralğan şul häm iske velosiped öçen az bulsa da, 5 € qazanırğa bula. Qimmät, äybät velosipedlarda da yörilär, älbättä - şähär tışında.

Qazan şartlarında

bez şunı eşlärgä täqdim itäbez:

Dürttöpçeklelär belän cäyäwlelärne beraz qısıp, velosuqmaqlar öçen urın tabarğa. Qazannıñ meñyıllığında küpsanlı xörmätle qunaqlarıbızğa şähärebezneñ niqädär matur häm bay mädäniätle buluın kürsätergä kiräk, häm monıñ öçen iñ caylı transport - iketöpçek bulırğa tieş.

Qazandağı kriminal' xälne iskä alıp, velotoraqlarnıñ tüläwle bulsa da, saqçılı bulu tieşlegenä kildek. Şähär xäkimiäte bítaraf qalsa da, üz eş yäki uqu urınığızda, gömbä kebek üskän kibetlär yanında iketöpçek toraqların yasattırırğa kiräk.

Quyğan mäs'älälärebez sezgä dä urtaq bulsa, iketöpçektä yörergä yaratsağız, zínhar, bäxäslektä fiker qaldırığız